Regaal Resources Ltd IPO: मक्का-आधारित विशेष उत्पादनांमध्ये आघाडीवर असलेली रिगाल रिसोर्सेस लिमिटेड आपला प्रारंभिक सार्वजनिक प्रस्ताव (IPO) 12 ऑगस्ट 2025 रोजी गुंतवणूकदारांसाठी खुला करणार आहे. हा IPO 14 ऑगस्ट 2025 पर्यंत खुला राहील, आणि कंपनीने यासाठी प्रति शेअर 96 ते 102 रुपये किंमत श्रेणी निश्चित केली आहे. एकूण 306 कोटी रुपये उभारण्याच्या उद्देशाने हा IPO 210 कोटींच्या नव्या समभागांचा आणि 94.12 लाख समभागांच्या ऑफर फॉर सेल (OFS) चा समावेश आहे. गुंतवणूकदारांच्या नजरा या IPO कडे लागल्या असून, यामुळे शेअर बाजारात नवीन उत्साह निर्माण होण्याची शक्यता आहे.
रिगाल रिसोर्सेसचा हा IPO बुक बिल्डिंग पद्धतीने असून, यात 35% हिस्सा किरकोळ गुंतवणूकदारांसाठी (RII), 15% गैर-संस्थात्मक गुंतवणूकदारांसाठी (NII), आणि 50% पात्र संस्थात्मक खरेदीदारांसाठी (QIB) राखीव आहे. याशिवाय, 30% हिस्सा अँकर गुंतवणूकदारांसाठी राखीव ठेवण्यात आला आहे. किरकोळ गुंतवणूकदारांसाठी किमान 144 शेअर्सचा लॉट असून, यासाठी 14,688 रुपयांची गुंतवणूक आवश्यक आहे. मोठ्या गैर-संस्थात्मक गुंतवणूकदारांसाठी (bNII) 9,936 शेअर्स (69 लॉट) साठी 10,13,472 रुपये, तर छोट्या गैर-संस्थात्मक गुंतवणूकदारांसाठी (sNII) 2,016 शेअर्स (14 लॉट) साठी 2,05,632 रुपये गुंतवणूक आवश्यक आहे.
IPO ची वैशिष्ट्ये
- किंमत श्रेणी: 96 ते 102 रुपये प्रति शेअर (फेस व्हॅल्यू 5 रुपये).
- लॉट साइज: 144 शेअर्स आणि त्याच्या पटीत.
- इश्यू साइज: 306 कोटी रुपये (210 कोटी नवे समभाग + 96 कोटी OFS).
- लिस्टिंग: BSE आणि NSE वर 20 ऑगस्ट 2025 रोजी प्रस्तावित.
- वाटप तारीख: 18 ऑगस्ट 2025 (प्रस्तावित).
- रिफंड आणि शेअर क्रेडिट: 19 ऑगस्ट 2025.
- बुक रनिंग लीड मॅनेजर: पॅन्टोमॅथ कॅपिटल अ‍ॅडव्हायझर्स प्रायव्हेट लिमिटेड आणि सुमेधा फिस्कल सर्व्हिसेस.
- रजिस्ट्रार: MUFG इंटाइम इंडिया प्रायव्हेट लिमिटेड (लिंक इंटाइम).
कंपनीची आर्थिक कामगिरी
रिगाल रिसोर्सेसने आर्थिक वर्ष 2025 मध्ये मजबूत कामगिरी नोंदवली आहे. कंपनीचा महसूल 2024 मधील 600.02 कोटी रुपयांवरून 52.52% वाढून 915.16 कोटी रुपये झाला. निव्वळ नफा 2024 मधील 22.14 कोटी रुपयांवरून 115% वाढून 47.67 कोटी रुपये झाला. कंपनीच्या या वाढीमुळे गुंतवणूकदारांमध्ये आत्मविश्वास निर्माण झाला आहे.
IPO मधून मिळणाऱ्या निधीचा उपयोग
नव्या समभागांतून मिळणाऱ्या 210 कोटी रुपयांपैकी 159 कोटी रुपये कंपनीच्या काही थकबाकी कर्जाची परतफेड किंवा अंशतः परतफेड करण्यासाठी वापरले जाणार आहेत. जून 2025 पर्यंत कंपनीचे एकूण कर्ज 561.2 कोटी रुपये आहे. उर्वरित निधी सामान्य कॉर्पोरेट हेतूसाठी वापरला जाईल.
कंपनीबद्दल थोडक्यात
कोलकात्याहून मुख्यालय असलेली रिगाल रिसोर्सेस लिमिटेड बिहारमधील किशनगंज येथे 47.92 एकरांवर पसरलेल्या अत्याधुनिक, झीरो लिक्विड डिस्चार्ज (ZLD) उत्पादन सुविधेसह कार्यरत आहे. कंपनी मक्का-आधारित उत्पादने जसे की नेटिव्ह आणि मॉडिफाइड स्टार्च, ग्लूटेन, फायबर, मक्का पीठ, बेकिंग पावडर आणि कस्टर्ड पावडर तयार करते. ही उत्पादने अन्न प्रक्रिया, कागद, पशुखाद्य आणि चिकटवणारी उद्योगांसाठी वापरली जातात. कंपनीची ग्राहक यादीत एमामी पेपर मिल्स, सेंच्युरी पल्प अँड पेपर आणि कृष्णा टिश्यूज यांसारख्या नावाजलेल्या कंपन्यांचा समावेश आहे.
प्रमोटर्स आणि व्यवस्थापन
कंपनीचे प्रमोटर्स अनिल किशोरपुरिया, श्रुती किशोरपुरिया, करण किशोरपुरिया आणि BFL प्रायव्हेट लिमिटेड आहेत. अनिल किशोरपुरिया हे कंपनीचे अध्यक्ष असून, त्यांच्या नेतृत्वाखाली कंपनीने 2018 मध्ये 180 टन प्रतिदिन (TPD) पासून 2025 मध्ये 750 TPD पर्यंत आपली उत्पादन क्षमता वाढवली आहे.
