रील बनवण्याच्या धुंदीत रेल्वेच्या खाली चिरडून २२ वर्षीय तरुणाचा मृत्यू; एक जण जखमी

शेगाव (बातमीवाला): सोशल मीडियावर रील्स बनवण्याच्या नादात आज एका तरुणाला जीव गमावावा लागला. शेगाव तालुक्यातील आळसणा गावाजवळील चारमोरी पुलावर धावत्या रेल्वेसमोर रील काढताना २२ वर्षीय शेख नदीम शेख रफीक याला धडक बसली आणि तो जागीच ठार झाला. त्याचा मित्र सय्यद शाकीर सय्यद नासीर (२८) याने जीव वाचवण्यासाठी पुलावरून उडी मारली, आणि तो गंभीर जखमी झाला आहे.

गुरुवार सायंकाळी साडेचारच्या सुमारास ही धक्कादायक घटना घडली. दोघेही खामगाव तालुक्यातील पिंपळगाव राजा येथील रहिवासी. आळसणा येथे एका लग्न सोहळ्यासाठी आले होते. गावालगत नागपूर-मुंबई रेल्वे ट्रॅक आहे. तिथेच रील बनवण्यासाठी ट्रॅकवर उभे असताना, नदीमने कानात हेडफोन्स घातले असल्याने त्याला रेल्वेच्या हॉर्नचा आवाजच ऐकू आला नाही.

रेल्वेगाडी वेगाने येत असताना नदीमला धडक लागली आणि तो रेल्वेखाली चिरडला गेला. दुसरीकडे शाकीरला रेल्वे जवळ आल्याचे कळताच त्याने जीवाच्या आकांताने चारमोरी पुलावरून खाली उडी मारली. या अपघातात तो जखमी झाला असून, सध्या शेगाव येथील सईबाई मोटे सामान्य रुग्णालयात त्याच्यावर उपचार चालू आहेत.

स्थानिक पोलिसांनी घटनास्थळी धाव घेतली असून, मृतदेहाचा पंचनामा करून शवविच्छेदनासाठी पाठवला आहे. ही घटना सोशल मीडियाच्या अतिच्या नादाची तीव्रता अधोरेखित करणारी आहे. फेसबुक, इन्स्टाग्रामवर रील्ससाठी धावणाऱ्या तरुणांना आता जीवाची किंमत समजली पाहिजे. रेल्वे ट्रॅक, पूल किंवा धोकादायक ठिकाणी सेल्फी किंवा व्हिडिओ शूटिंग टाळा, अन्यथा अशा करुणा अंताची पुनरावृत्ती होऊ शकते.