Elvish Yadav Firing Incident 2025: वादग्रस्त युट्यूबर आणि बिग बॉस ओटीटी विजेता एल्विश यादव याच्या गुरुग्राममधील सेक्टर 56 येथील निवासस्थानाबाहेर आज 17 ऑगस्ट 2025 पहाटे 5:30 ते 6:00 च्या सुमारास अज्ञात हल्लेखोरांनी अंदाधुंद गोळीबार केल्याची धक्कादायक घटना घडली. या गोळीबाराने परिसरात खळबळ उडाली असून, पोलिसांनी तपास सुरू केला आहे.
पोलिसांनी दिलेल्या माहितीनुसार, तीन मास्कधारी हल्लेखोर दुचाकीवरून आले आणि त्यांनी एल्विशच्या घरावर सुमारे 20 हून अधिक गोळ्या झाडल्या. गोळीबारात घराच्या तळमजल्यावर आणि पहिल्या मजल्यावर गोळ्या लागल्याच्या खुणा दिसून आल्या. सुदैवाने, या हल्ल्यात कोणीही जखमी झाले नाही. घटनेच्या वेळी एल्विश यादव घरी नव्हता, परंतु त्याचे काही सहकारी आणि कर्मचारी घरात उपस्थित होते. एल्विश सध्या हरियाणाबाहेर आहे, असे त्याच्या कुटुंबीयांनी सांगितले.
घटनेची माहिती मिळताच गुरुग्राम पोलिसांचे पथक घटनास्थळी दाखल झाले. फॉरेन्सिक तज्ज्ञांनी गोळ्यांचे अवशेष आणि इतर पुरावे गोळा केले असून, परिसरातील सीसीटीव्ही फुटेज तपासले जात आहे. पोलिसांनी सांगितले की, यादव कुटुंबाकडून तक्रार दाखल झाल्यावर लवकरच एफआयआर नोंदवला जाईल. एल्विशच्या नातेवाईकांनी सांगितले की, या हल्ल्यापूर्वी त्याला कोणतीही धमकी मिळाली नव्हती.
हा हल्ला दहशत पसरवण्याचा प्रयत्न असू शकतो, असे पोलिसांचे प्राथमिक अंदाज आहे. यापूर्वी जुलै 2025 मध्ये रॅपर राहुल फझिलपुरीया याच्या गाडीवरही असाच हल्ला झाला होता, ज्यामुळे गुरुग्राममधील कायदा आणि सुव्यवस्थेवर प्रश्नचिन्ह उपस्थित झाले आहे. पोलिस या हल्ल्यामागील कारणांचा आणि हल्लेखोरांच्या ओळखीचा शोध घेत आहेत.
